作者:「言」燒爸
最近一則城中熱話，莫過於C All Star 經理人阿拔，公開嫌Mirror廣告多到「擾民」，又寸佢哋係全職廣告從業員!雖然釗峰On仔有出Po為事件降溫，不過無減眾粉及網民反諷對方葡萄。葡萄，潮語，指人嫉妒一啲人哋有但自己冇嘅行為。點解人會嫉妒人?究竟呢個行為係好定係衰?點樣可以化 嫉妒為動力，令自己進步?
人點解會比較?
正所謂冇比較冇傷害，美國社會心理學家 Leon Festinger 於1954年提出Social Comparison Theory，佢指出當人响唔夠客觀標準下，就會傾向利用其他人同自己比較，從而評價自己。適當運用比較可以提高自信心，成為自我完善基礎。不過如果當比較建立唔實際嘅標準，呢啲功能會失效。讀Econ或HR 嘅朋友應該有聽過由另一位美國心理學家John Stacey Adams於1965年提出Equity Theory，指出員工激勵程度來源於對自己同參照對象（Referents）嘅報酬加投入主觀比較感覺。即係當一個人做出成績並取得報酬後，唔單止會關心自己得到幾多，更會關心相對量。所以會做種種比較來確定自己所獲報酬係咪合理，而比較結果將直接影響之後工作積極性。
嫉妒的正反面
心理學家將嫉妒分為善意同惡意，前者會以此為動力，通過觀察、學習、模仿對方去令自己升呢! 後者就會試圖用遙言、詆毀等破壞行為，去減少自己處於劣勢感覺，甚至從道德層面去詆毀。哈佛商業評論於2010年曾刊登一篇名為<轉化嫉妒的七大思維>(Envy at Work) 文章，提到過份嫉妒對個人進步同企業有災難性嘅破壞力! 呢篇文章仲設有自我評估問卷，筆者強烈推薦!正所謂你嘅格局有幾大，成就便有多大! 格局包含你嘅氣量，遇強愈強，良性競爭先會有進步。不過，有時都會聽到有人咁樣安慰你，「你洗咩同人比啫?盡咗力咪得囉!」， 如果太過側重呢個態度，又會好容易不思進取，所以記住要拎個平衡，最好方法係先搞清楚自己定位，自己想要咩?追求咩?
如其葡萄？不如自我增值。按此了解我們的職場技能增值計劃。
Tony Robbins 的人類6大需求
對於人性需求有好多研究同理論，今次同大家分享嘅係由全球知名心靈導師、人生教練及勵志演說家Tony Robbins 提出嘅 Six Human Needs。每個人都對於以下6樣野都有所追求，而且先後次序都唔唔同:
1. Certainty 確定性: 一定程度穩定性同安全感
2. Uncertainty/Variety 多元性: 對改變、貪新鮮同挑戰嘅需求
3. Significance 存在感: 與別不同或被需要嘅感覺
4. Connection/Love 連繫/愛: (唔駛解釋啦吓嘩?)
5. Growth 個人成長: 升呢
6. Contribution 貢獻付出: 貢獻、無私付出、幫人
由於篇幅有限，下次同大家再分享多啲呢六大需求!總之，當你清楚自己需要咩、追求咩，就唔會咁易亂比較，配合埋氣量同正面態度(多用positive anchoring 有助增強信心，詳情可參考<伍家朗球衣事件非迷信 — 談談Anchoring>)就可以化葡萄為動力!
「言」燒爸個人檔案
熱愛培訓事業的80後，推崇棟篤笑式演講風格。喜歡透過言語感染其他人，專長於團隊合作、銷售技巧及個人突破培訓，於上市公司擔任高級經理，曾獲業界獎項。最初視別人為培訓對象，後來發現自己才是學員。現在人生目標是為兒子立下對生命熱誠的榜樣