（撰文：Edward Tse）
各位網友，前幾日香港預言界KOL蕭若元同冇人會揀佢做老公嘅香港新演員游學修，喺Clubhouse 同YouTube上映左一場關於「香港電影工業死左未」嘅世紀辯論。小弟我對演藝事業冇認識，不過聽完兩位嘅論述即時諗起心理學近年好興嘅一個concept：Growth Mindset （成長心態）同埋Fixed Mindset （定型心態）。由史丹福大學心理學教授Carol Dweck 提出，基於對自己能力上嘅定義，呢兩種心態對於個人學習甚至於life satisfaction 人際關係等等都有好關鍵嘅影響。
或者，遊學修同蕭若元嘅分別，就在於一個Growth Mindset。（利申Clubhouse我唔在場，以下所講嘅都係根據YouTube 睇片）
成功係證明俾自己睇？定係…
點樣為之一個成功嘅電影人？做到下一個周潤發/周星馳？金像獎、奧斯卡，定係要有二百幾架車，吊哂威也先叫做成功？Fixed Mindset嘅人往往覺得人就係要達成一個又一個嘅「指標」，做電影就係要拎到啲咩獎，或者做到嘅作品要俾好多好多人傳頌。的確，每個人都想成功，但唔通只有做到呢一啲指標先可以叫做成功？冇大排場就只係「煮飯仔」、家家酒？Fixed Mindset 心中所謂成功，往往都建基於他人嘅目光，總之「巴閉囉、英雄主義、疊馬」，就為之成功。
相反，Growth Mindset 唔會特別去理其他人點定義「成功」，因為佢地相信人係喺一個不斷進步嘅spectrum，所謂「失敗」其實係一個反思下次點樣做得更好嘅機會。既然電影市場冇左八十年代嘅風光，會唔會可以透過其他方式去做呢個行業（例如網路）？\
努力係徙勞無工？
因為相信人嘅改變係有限，Fixed Mindset總覺得世界好多嘢「整定」左，牌面唔好就無謂打。蕭生多次談及到，香港電影業Probability 係等於零，網片什麼的就只係可以自娛。既然電影將來無望，亦冇必要繼續去努力，免得人到中年揸的士。反之，Growth Mindset認為只有不斷學習先能夠令自己做得更好，游學修自己都講，佢自己都不斷學習緊新媒體、新語言。而呢個努力係會有成果，呢個相信由CapTV到試當真嘅影片質素已經可以見得到。固步自封只會換來一事無成，蕭生個年代大家仲會睇亞視，而家都全部睇哂ViuTV啦。
從批評中學習
呢一點有啲Tricky，因為睇翻段片，蕭生唔算完全係一個無視他人意見嘅人（最起碼佢會去聽人講去睇下進撃），而當人地同佢講翻游學修係邊位個時佢都有提到一句「我之後有睇翻佢啲片」。不過相較游學修能夠針對蕭生所講嘅每個論點，輔以例子去質疑。反而燒山就只係不斷重覆當年電影盛況無可能重現，將質疑純粹歸因為一個「恨」。Growth Mindset 關鍵在於要不斷學習，自我質疑，而接受他人批評正正係其中一種方式，正如游學修所言「可能我錯, 但唔會斷言係冇可能」。
總結
作為生活喺香港嘅「九十後」，的而且確生活愈來愈唔容易，無論邊一個行業都係。要做到Growth Mindset ，只有相信未來個隕石撞地球嘅機率，不斷 Trial & Error。