fbpx
【林作鍾培生】老細,有冇諗過你身邊好多Haters?

【林作鍾培生】老細,有冇諗過你身邊好多Haters?

電競富三代鐘培生vs西裝保險界KOL 林作:百萬擂台戰

(撰文:Edward Tse)

呢排香港網民睇最關心嘅新聞,相信除左堂食放寬左,就係電競富三代鐘培生同埋西裝保險界KOL 林作嘅百萬擂台戰:兩個有錢(或者懶係有錢)三十出頭年輕人,因為林作喺鍾培生嘅YouTube 一句留言「抄我100萬?」而引致鍾培生IG公開用一百萬約戰林作,食到成個連登一地花生。

雖然so far 民意一面倒支持有操開拳嘅鍾培生打低林作,不過如果做個民調,都幾肯定大家支持鍾只係因為太討厭林作,希望佢可以俾人打鑊金,相較之下鍾培生算係一個lesser evil 。論到Haters嘅數目,相信佢地兩位喺香港亦算得上係數一數二 – 而重點係,政治陣營絕對唔係佢地儲到咁多Haters嘅主因,換言之,佢地嘅問題亦有可能出現在你我身上,從而令我地身邊嘅NewGen 同事成為我地嘅Haters!

我諗你都唔想好似佢兩位咁靠著人見人憎出名吧?所以,今日一齊黎分析下,到底喺佢地兩個身上面出左咩事,以致可以令佢地激嬲咁多人?

林作點解佢兩個咁多Haters?

能夠吸納Haters,因為佢地有一種叫做「唔識尊重人」嘅態度。

如果有留意開林作佢地兩個應該唔駛太多講,兩人大多數上報都係因為出言表現嘅各種不尊重引致:無論係借Chadwick Boseman同錢國偉死訊宣傳保險,定還是話iBankers 同大律師都買唔起Brioni,可以睇得出唔尊重其他人可以話係最能招惹Haters嘅主因。普世價值教曉我地,你可以唔同意我,但你唔可以唔專重我。當有人表現出唔專重嘅時候,就會損害到自尊心,從而觸動他人嘅憤怒同Hate。

你可能會話「駛你講咩?我點會搵人地死訊嚟講呀」,留意返,尊重唔止係一次兩次嘅事,而係一種態度。點解麥明詩叫佢地「尊重女性」又冇乜人話返麥明詩太女權/抽水?因為兩人已經多次喺言論中表現出不尊重,唔講林作,鍾培生就曾經以性工作者作貶義詞去貶低其他職業,又於自己Channel話TB係一種Mental Problem。一次當你失言,多幾次人地就只會覺得你係個唔識得尊重嘅人。

返工都有Haters?

作為打工一族,的確我地嘅同事做嘢未必啱我地心水,跟著就會諗「後生真係冇經驗」、「做嘢都唔認真嘅」云云,又會喺度諗「我呢啲先叫勁」、「要學我咁先得架嘛」,然後不知不覺間,自己每日嘅隻言片語就開始流露出「唔識尊重人」:有可能只係對新同事語氣較為命令,或者不等同事解釋就覺得他「懶」、「唔想OT」。

聽說過有朋友回內地出差,星期六日工作至凌晨時上司講了一句「做到兩點咋?我個陣日日做到四點都冇得透呀!」每次「唔尊重」流露左,佢就會喺心目中暗暗地俾個「Hate」你,日子耐左,慢慢佢就會subscribe做你嘅Hater。不難想像,那位即時下定決心回港後另謀高就 – 同你OT唔係問題,你唔讚我都得,但你唔尊重我就唔得。

咁點解林作同鍾培生仲有人同佢地搵食?呢層我就真係唔清楚,不過正所謂,有錢駛得鬼推磨。人地可以課一百萬去買禮物俾佢啲YouTube fans,你得唔得?換個角度睇,我地冇呢個財力,但我地可以選擇做一個點樣嘅人,或者俾幾舊水去學習下當中嘅技巧(或者睇下我地嘅文章,唔敢講咩大道理,但肯肯定有個新角度俾到你睇)。

唔想有Haters?

個人成就不一定能夠得到尊重。無論你好似鍾培生咁係30 Under 30又好(鍾於2018年因為香港電子競技有限公司而入選),定好似林作咁係個大狀/補習天皇/top sales,唔想有Haters,其實好簡單,just show your respect。人地做到咁夜,咪講句「辛苦哂」,do 左個favor 咪講一句「唔該」。佢地做得唔好唔需要即刻react,咪觀望耐啲先,下次再出事咪提下佢點做。如果覺得好造作,不如撫心自問:你真係覺得自己相別不同?

(p.s. 到截稿前林作居然撕毀合約,順帶一提,做老細講左就要做,是常識吧?)

Spread the Knowledge

Leave a Comment

發佈留言必須填寫的電子郵件地址不會公開。

Scroll to Top